Алматы облысында Назарбаевтың бағдарламасы жүзеге аспай жатыр

Июнь 23, 2020 | 91 |

Бүгін Талдықорған қаласына Талғар мен Еңбекшіқазақ аудандарында балабақша ашқан он бес шақты кәсіпкер келді. Олар облыс басшысы Амандық БАТАЛОВПЕН кездесуге ниетті еді. Алайда әкім коронавирусқа шалдығып қалғандықтан жолығудың реті түспеді.

2019 жылы қос ауданның бір топ кәсіпкерлері экс-президент Нұрсұлтан НАЗАРБАЕВТЫҢ «Балапан» бағдарламасы бойынша балабақша ашады. Әрине, аудан басшылығына мемлекет тарапынан көмек болатыны жөнінде сұрап нықтап алады. Жергілікті билік өкілдері кәсіпкерлердің бастамасына қуанып, жәрдемдесетіндерін айтқан екен.

Естеріңізге сала кетейік, 2010 жылы президент Нұрсұлтан ӘБІШҰЛЫ үкімет пен әкімдерге балаларды мектепке дейінгі біліммен қамту бойынша «Балапан» арнайы бағдарламасын жүзеге асыруға кірісуді тапсырған-ды. Бұл бағдарлама бойынша әр балаға мемлекеттен демеуқаржы бөлінеді. Сол кезде облыстар мен қалалар жарыса президент бағдарлаамсын жүзеге асыруды бастап кеткен еді. Бірақ…

Кәсіпкерлердің айтуынша, қазір 70 жуық ашылған балабақшалардың 50 шақтысы жабылып қалған, хабарлайды malim.kz.

«Мемлекет халықты 100 пайыз балабақшамен қамтыған жоқ. Үкіметке болысу үшін біз ашылдық. Бізге үкімет ашыңдар, ашыңдар деді. Халық үшін жұмыс жасайық. Біз көмектесеміз деп уәде берген. Енді қаржылай көмек көрсете алмай отыр. Осыған ішіміз күйеді», – дейді Талғар ауданына қарасты Тұздыбастау ауылының «Дария» балабақшасының меңгерушісі Әйгерім НОҒАЙБАЕВА.  

«Біз 2019 жылы қыркүйек айында жекеменшік балабақша ашқан едік. Содан бері әкімдікке талай барамыз. Балалардың ұлттық бірыңғай дерекетер қорында тіркелуін талап еттік. Біз мемлекеттік тапсырыс алмағандықтан бізге тіркеуге тыйым салынды. Енді қараңыз. Карантинге дейін бізде 90 бала болған. Қазір 50 бала бар. Бұл балалардың көбі басқа балабақшалардан келді. Бірақ олар ұлттық бірыңғай деректер қорында қалып  отыр. Ата-аналар бізге тіркейін десе бізде ондай мүмкіндік жоқ. Сонда қараңыз.

Бұл жерде заңсыздыққа барып та жатқандар бар сияқты. Сол балалар тіркеуде бар деп демеуқаржы алатын балабақшалар мемлекеттің қаржысын құрдан құр алып жатқан сияқты. Оны тексеріп жатқан ешкім жоқ. Жаңа осы сұрақты облыстық білім басқармасына қойдым жауап жоқ», – дейді Талғар ауданына қарасты Тұздыбастау ауылының «Еркенұр» балабақшасының меңгерушісі Жанар СЕЙСЕНБАЕВА.  

Сондай-ақ, Жанар Сейсенбаева тіпті «Балапан» бағдарламасына іліге алмай қалғанын айтады. Президент Назарбаевтың «2020 жылға қарай қалалық және ауылдық жерлердегі балалардың бәрі мектепке дейінгі оқыту және тәрбиемен қамтылуы керек» деген сөзін алға тартады. Әр кәсіпкер облыс орталығына әкім Баталовтың атына арнайы хатта жазып келіпті. Бірақ жолығудың реті жоғарыда айтылғандай келмеді.

Облыстық білім басқармасындағылар кәсіпкерлердің айтқан базынасына қатысты тексеріс болады деп қысқа қайырды.

«Бұл мәселені анық қанығын анықтайық. Содан кейін нақты жауабын айтайын. Өздеріңіз қараңыздаршы мен енді қазір бірден кесіп ештеме айталмаймын ғой. Себебі мемлекеттік тапсырыс алып балабақшалардың балалары қаншалықты жекеменшік балабақшаларға ауысты. Бұны тексеру керек, анықтау керек. Бұл кісілер айтқан фактілер қаншалықты шын екенін білуім керек.  Сосын нақты жауабын береміз», – дейді Алматы облыстық Білім басқармасының басшысы Майгүл ОМАРОВА.

Алматы облысында мемлекеттік тапсырыс бойынша 72 мың балаға ақша бөлініп отыр. 2020 жылы  мектепке дейінгі мекемелермен 100 пайыз қамту үшін қосымша 29,7 млрд бөлініпті.

Қаржылай шығынға баттық деген кәсіпкерлер заңсыздықтар да болып жатқан сынайлы дейді.

 

Поделиться ссылкой
О том, как поделиться

Мы в социальных сетях